صباح الخير ا . حسام ... ارجوك اعرض قضيتى بشكل عام فهى قضيه عامه وكتير من سيدات مصر يعانوا منها.. القضايا الشرعيه بتطول قوى ولو الست ما بتشتغلش ولها مورد كانت حتجوع هى وولادها وتبقى فى الشارع ولو حضرتك عايز اى تفصيل انا تحت امرك . ولكن اسمحلى اوجز فى الموضوع .... انا خلعت جوزى وكان رد الفعل حيله بعقود وهميه لبيع شقه الحضانه وقد كان والقضيه بقالها 3 سنين ونص فى المحكمه عشان اتمكن منها واربى فيها بنتى وطبعا من البديهى عدم انفاق ولا مليم على البنت وطبعا عفشى عنده . ولولا انى امراه عامله ومرتبى الحمد لله ساترنى . اجرت بيه شقه مفروشه وعايشه فيها انا وبنتى بمجهودى الشخصى تماااااااااما وكل جلسه قضيه تؤجل اقل مده شهر والمره ديه اتاجلت 5 شهور عشان الاجازه القضائيه ... المقصود من كل هذا الحوار ان مفيش حكم صدر . اكرر مفيش حكم صدر .. ولما صدر حكم فى قضيه العفش انه من حقى .. الحكم لم ينفذ .. اكرر الحكم لم ينفذ .. يعنى لا قضاء سريع ولا تنفيذ . ماذا تفعل لو كنت مكانى ؟؟؟؟؟؟؟؟؟؟

 

 

 جاءتني شكاوي عديدة على منظومة القضاء المصري، وسوف أعرضها تباعاً، منها مشاكل بطء التقاضي، ومشاكل محاكم الأسرة، ومشاكل أجازات القضاء، وإن كنا نريد بناء دولة جديدة، فعلينا إعادة صياغة المنظومة القضائية بالكامل

 

سائق التاكسي اللي باتعامل معاه الشهر ده اخر قسط للعربية وبقاله شهرين مقدما بيخلص في اوراقه ....اولا اتطلب منه اي صورة او شهاده للسيارة الابيض واسود القديمه اللي سلمها ...طبعا داخ عشان يجيبها ...ثانيا الاعلانات ع التاكسي هو كان من الدفعه اللي الاعلانات كانت بتساهم في تحمل اقساطه جاءت شركة الاعلانات وشالت الاعلان اخر كام شهر ولم تستبدله باخر وطبعا بانت ليه اما راح يسوي قالوا له عليك عدة شهور بدل الشركه المعلنه تسددهم قالهم طيب وانا ذنبي ايه ؟؟؟؟؟ طيب روح للشركه راح للشركه بعد دوخه عشان يريح نفسه دفع المبلغ عشان يخلص ....طيب كده المخالصة للاعلان تعالي كمان يومين راح ياخدها قالوله تطلع بقي ع المالية ومن المالية البنك المركزي ومنه ع البنك الاهلي اللي بيسدد فيه القسط وبعدين العكس وبعدين هم يبعتوا المخالصه ع المرور لييييييييييه كل ده ولصالح مين وفين الكمبيوتر وليه مايكونش فيه مكان مججمع لكل الجهات دي ممثلة في موظفين او مناديب عن كل جهة في مكان واحد ...ارحموا من في الارض يرحمكم من في السماء ياموظفي الحكومه والجهات .....نريد التخلص من بيروقراطيات الورق

 

 

 

 أنا واحد من الناس اللي معندهمش سيارة، ومعظم تحركاتي بتاكسيات، وأعرف تماماً مدى معاناة سائقى التاكسي في مصر، والتي تضاعفت بعد يناير نظراً للفوضى والانفلات وضرب السياحة موضوع مهم طرحه في الإعلام وعلى الرأي العام، بيمس حياة عشرات الآلاف من سائقي التاكسي، وبيمس حياتنا

 

 

حضرتك عارف قوانين البلد الطفل اللذى لا يسجل فى كشوفات وزارة التربية و التعليم فى المراحل الألزامية هناك مسائلة قانونية و غرامات على الأهل و ليس هناك قوانيين تستثنى ذوى الأحتياجات الخاصة لذللك كل من عنده طفل فى هذه الحالة يسجله فى أى مدرسة و عادتاً تكون مدرسة حكومية على أن يدفع المصروفات و ينتقل تلقائياً فى المرحلة التالية دون أمتحانات (كوسة يعنى) حتى لا يسائل الأهل. وفى نفس الوقت يتجه الأهل رحلة ايجاد المركز المناسب لحالة الطفل (فذوى الأحتياجات الخاصة وضعهم مختلف فليس هناك حالة مطابقة للأخرى قد يتشابهوا فى الحالة العامة و لكن لكل طفل أستيعابه الخاص و درجة ذكائه التى تحتم أن يكون نظام التعليم مختلف فالطفل مثلاً يحضر حصص فى فصل مع باقى الأطفال لعمل نشاط معين و عدد الأطفال قد لا يتعدى ال10 فى فصل واحد لسهولة السيطرة عليهم ثم يحتاج كل طفل لمدرس خاص داخل المدرسة ليركز معه) ثم ضف الى اليوم الدراسى دروس تخاطب عند مراكز متخصصة ثم متابعة دكتور نفسى ثم دروس تنمية مهارات ثم متابعة الحالة الطبية للطفل اذا كان ممن يتعاطوا دواء لتحسين سلوك أو كهرباء أو لو طفل هايبر كل ذلك بجانب المدرسة أو المركز المتخصص. ثم تأتى كارثة المدارس ابن أختى كان فى مدرسة كل أسبوع يأتى بكدمات و هو لا يتكلم و المديرة لاتقابل أحد و أن قابلت فهى تتنصل من المسؤلية و فوق كل ذلك فى اخر الأمر قالت لها أن أبنها لن يستطيع استيعاب مناهج الوزارة و فى خلال سنة هى مضطرة أن تفصله ( بعض المدارس لذوى الأحتياجات الخاصة تسجل الأطفال فى كشوفات التعليم الألزامى و تمشى بمنهج موازى متوافق مع قدرات الأطفال و يتم أنتحانهم مع مدرس لأن منهم من لا يكتب أصلاً حتى الوصول لسنة ثانية أو ُثالثة أبتدائى ثم يتم فصلهم لعدم قدرتهم على التعلم) . يجب أن يكون هناك قوانين لضمان حقوق هؤلاء الأطفال فى أحتياجاتهم الخاصة ليس قولاً لكن بالفعل أحنا بنقول عليهم ذوى أحتياجات خاصة ولكن ليس لهم أى قوانين تحفظ لهم حقوقهم التى تتناسب مع أحتياجاتهم "الخاصة

 

 

 دي قضية بتمس فئات بالملايين، يصل عدد ذوي الاحتياجات الخاصة في مصر إلى عدد يتراوح بين 6 إلى 8 مليون، ولا يلقون أي رعاية أو اهتمام بقدراتهم الخاصة جداً أيضاً، بل على العكس، ذوي الاحتياجات البدنية المكمّلة بيتعرضوا لكل أشكال العسف، على سبيل المثال، هل تعلموا أن الاجهزه التعوضيه واجهزه شلل الاطفال عليها ضرائب؟ هل تعلموا ان سماعات الصم والبكم تصل الي ٤٠٠٠ جنيه؟ شئ

 

 

مساء الخير .. اكتب اليك عن تجربتى المريرة فى محكمه الاسرة و الطفل.... و التى من المفروض انها تهتم و تختص بالمحافظه على حقوق الاطفال القصر ... و لكننى اؤكد لسيادتكم ان تلك المحكمه هى بؤرة و محل لنموذج من نماذج الفساد الموجود فى كل مكان بمصر ان لم تكن اشد اماكن انتشر الفساد و المحسوبيه فكل شئ بالوساطه و المحسوبيه فيها .... توفى زوجى و ترك لى اولاد قصر و ترك لنا ارث و الحمد لله... و كان الجد على قيد لحياه و لكنه كبير بالسن و حسب القانون المصرى من فوق ال 70 عام تسحب منه الولايه الشرعيه و تذهب الوصايه لام الاطفال (انا) و ذلك حسب الشرع و قمت انا بالتوجه لمحكمه الاسرة و الطفل لعمل الاعلان الشرعى و اثبات ما تركه زوجى و قدمت كافه المستندات الداله على ذلك و لكن نظرا للمحسوبيه فان وكيل النيابه ظل يمطل فى اصدار القرار لسحب الولايه لمدة تزيد على ل 6 شهر و بعد معاناه و شكاوى عدة لمكتب النائب العام عرفت ان الملف كله عليه توصيه شديدة و ظلت احارب حتى صدر لى قرار الوصيه و هيهات يسيدى الفاضل فانه قرار على الورق فقط الى يومنا هذا... لم استطيع الى الان الحصول على ميراث اولادى... رغم قيامى بتقديم العديد من الشكاوى لكل من له صله بمحكمه الاسرة و الطفل و كل م يصدر هو استعداد لا قيمه له مجرد حبر على ورق و بالطبع لم يحضر اى حد و تقدمت بالعديد من الطلبات حتى يصدر قرار لى بانتدات احد من النيابه لمعانيه ما قمت باثباته من ارث زوجى و لا حياة لمن تنادى.. تجربتى عمره 7 سنوات و الى الان الوضع كما هو عليه ... مررت بالعديد من المشاكل و الى الان لم استطيع بفضل الفساد و المحسوبيه فى الحصول على اى شئ من ارثنا لا انا و لا اولادى .... الوضع من اسؤء ما يكون فى ذلك المكان المسمى بمحكمه الاسرة و الطفل ...كان الله فى عون السيدات و الاطفال القصر   اتمنى من الله ان المسئول الاول عن العدل بمصر ان ينظر الينا..

 

 

 

المنظومة القضائية المصرية بحاجة إلى إعادة صياغة كاملة، لا تستقيم الدولة إلا بالقضاء العادل الناجز الذي يعيد الحقوق لأصحابها، وثقتنا كاملة في أن يسبطيع القضاء المصري إعادة تصحيح أوضاعه جتى يعود بحق فخراً للوطن كما كان دائماً ويكون ان شاء

 

 

 

الاستاذ الفاضل حسام نصار تكرمت سيادتك بمساعدتنا فى نشر جزء من معاناتنا ومشاكلنا واسمح لى ان اقدم واحدة من هذه المشاكل التى يعانى منها معظمنا أنا من سكان مصر الجديدة منطقه الكوربه واللى ساكن فى مصر الجديدة يعرف يعنى ايه الكوربه يعنى اقدم وأرقى مكان فيها تعالى دلوقتى أتفرج على شارع ابراهيم باشا بقى اسوء من الحرفيين كله اتحول الى محلات اكسسوارات سيارات وطبعا الميكانيكيه والصنايعيه واقفين يقلبوا عيشهم وتسمع أقذر الألفاظ واحنا ماشيين ومش عارفين نركن سياراتنا خالص بسبب وضعهم للأقمار البلاستيكيه امام محلاتهم ويا ويل اللى يستجرا ويحاول يركن امام منزله السفاله وقلة الادب كلها تطلع لا بيهمهم سيدة او فتاه او رجل كبير من السكان الاصليين لهذه المنطقه يعنى مثلا إحنا ساكنين فى هذا المكان منذ عام ١٩٤٢ ورغم ذلك نشتكى او ما نشتكى هو وعدمه واحد مش عارفين نروح فين بقينا مش بنرضى ننزل علشان الركنه هذا غير الركنه تلاقيها صف اول وتاني وتالت والعربات فى الشارع مش عارفه تمشى ولذلك اصبح اقاربنا يرفضون زيارتنا اصبحنا محاصرين بكم هائل من الضوضاء والتلوث السمعى والبصرى والهوائ بالاضافة الى سوء الخلق والسلوك والتحرش اللفظى ناهيك عن الشبراوى بتاع الفول وقهوة اسوان اللى لما تعدى عليها تحس انك لا يمكن تكون فى مصر من مناظر الشباب والفتيات اللى قاعدين على القهوة وكمان قافلين الشارع وعاملين اشغالات طريق بأسلوب وقح والغريب انك ممكن تلاقى لجنه شرطيه في اخر الشارع مش عارفه واقفين بيعملوا ايه العربيات بتركن قدامهم بالمخالفة للقانون وقهوه السوايسه واسوان عاملين اشغالات على الشارع وعلى الرصيف ولاحياه لمن تنادى يا عالم ده إحنا ساكنين جنب قصر الاتحاديه نعمل ايه كل السكان المحترمين يتمنوا يسيبوا المنطقة دى لأننا بصراحه حاسين ان مصر الجديدة تحولت الى عشوائيه من العشوائيات وا تكلمنا قبل كدة واشتكينا لكن مفيش فائدة هل من الممكن حد يدلنا اه هو الحل وشكرا

 

 

 

 

 أنا عشت في مصر الجديدة منذ طفولتي إلى الآن، 55 سنة في مصر الجديدة، ولا أتصور نفسي أبداً عايش خارجها، بالنسبة لي كانت أجمل حي في العالم، وبالفعل كانت من أجمل أحياء العالم، لكن العشوائية ضربت في كل شئ فيها، سينمات اتهدت أو اتفلبت جراجات، جدائق اتدمرت، مباني اتشوهت، مقاهي تراثية اتباعت مفروش، متروهات اتشالت، كل شئ في مصر الجديدة اتغير للأقبح بكل أسف

 

 

جاءتني هذه الرسالة من متابعة لصفحتي، السيدة ياسمين علي محمد، لمن يرغب في المساعدة بأي شكل، عليه الاتصال بها عبر الفيسبوك، أنا نشرت بروفايلها مع رسالتها الآتية لسيد المحترم حسام نصار تحيه طيبه و بعد عرفت من صفحتك المتميزه من خلال متابعتى لك انك لديك القدره على مساعدة الغير فى مشاكلهم . مشكلتى تتلخص ان لى ابن وحيد يعانى من حاله صحيه تسمى الشلل الدماغى بسبب اهمال فى الولاده و انا بقالى 9 سنين بحاول اعمل العلاج الطبيعى ليه عشان يعرف يمشى لان كل المشكله عنده فى الحركه فقط الحمدلله و ليس العقل, داومت على قدر المستطاع انى اوفر العلاج المطلوب لكن للاسف كان فيه ظروف اخرى و هى ان والده قرر قطع الانفاق عليه من حوالى 3 سنين و ده غير ان مفيش مدرسه محترمه راضيه تقبله عشان الكرسى المتحرك و بيقولوا ان مش هينفع نقبله و مروان دلوقتى بقى تقريبا عنده 9 سنين و لسه مدخلش اى مدرسه و كمان علاجه الطبيعى من كتر التدهور اللى فى مصر بقى كمان محتاج عمليه ( ده كلام دكاترة العلاج الطبيعى ) انا عرفت ان فىه مستشفى فى سلوفاكيا للحالات اللى زى ابنى بس للاسف محتاجه مصاريف كتير و محتاجه للسفر اكتر من مره فى السنه. دى اول مره ابعت لاى انسان اقوله على حالة ابنى بالرغم من ان والدى كان لواء قوات جويه و لكنى لم الجأ له لانى عارفه كويس انه بيرفض الواسطه لاى حد من اهله عشان ميتفهمش غلط, . انا ببعتلك و انا بسال ربنا ان مشكلتى فى مروان ابنى فى العلاج و الدراسه تتحل على ايديك https://www.facebook.com/jasmine294

 

 

 من خالد العشري استاذى العزيز استاذ حسام قضيتى هى انى ذهبت الى الصين لاستيراد ملابس اطفال ومثلى مثل اى مصرى يسعى الى كسب رزقه بالحلال ولاكن حظى ان بضاعتى شحنت على مركب اسمها hanjin athens وملاك هذه السفينه الملاك شركة سكان ارابيا للتوكيلات الملاحيه وكان مفروض على هذه السفينه ان تدخل ميناء بورسعيد يوم ٦ مايو ٢٠١٤ ولكن حدث ما لم نكن نتوقعه حيث قيل لنا ان عطل بسيط حدث فى مولدات السفينه وحدث حريق به تم السيطره عليه ثم بعد ذلك انتظرنا دخولها حتى يوم 17 من نفس الشهر دخلت ميناء بورسعيد ولظروف لا نعلمها انزلت 5 حاويات ثم رفعتها تانى وبعد كدا رحت عن ميناء بورسعيد وانتظرنا انها تدخل تانى ولاكن لم تدخل فثار تجار بورسعيد وذهبو الى افرع التوكيلات الملاحية التى قمنا بالشحن عليها من بورسعيد فلم يستجيب الينا احد وقام التجار بتحرير المحاضر ضد التوكيلات ولم يستجيب احد حتى علمنا ان السفينه رحلت من المياه المصريه وذهبت الى قبرص حتى تسوية وضع الحاويات التى علمنا انه يوجد حاويات قد حرقت فى اول الامر حاويتان ثم بعد ذلك علمنا انها 17 حاويه ولا يوجد احد فى هذه التوكيلات يريد افادتنا فهل نجد من ينجدنا من من يتحكمو فى اموالنا وبضاعتنا ونحن على ارضنا هل نجد من يقف بجانب مصرى زيه وينجده من تحكم توكيلات ملاحيه اجنبيه اخذت بضاعتنا ورمتها فى قبرص ولا تريد افادتنا متى سوف تأتى بها. هذه هى قضيتى استاذى الكريم وادعو من الله ان اجد من يقف بجانبى وجانب كل متضرر معى على صفحتك واشكرك واتمنى من الله ان يفك كرب كل مكروب

 

 

 

 مأساة بكل المقاييس، والممارسات دي لازم تتوقف تماماً، هذا التكاسل، وهذه الموالسة، وتلك الاتكالية، وذلك الفساد الإداري، كل هذا يجب أن يخرج من مصطلحاتنا وإلى الأبد لا فيه حد بياخد قرار، ولا حد بيحاسب، ولا إعلام بيشير، ولا حاجة خالص، فالحين يتكلموا في مين باس مين من راسه وخلاص، هي دي بلدنا وهو ده إعلامنا المشين، وهما دول سياسيينا الأرزقية