درويشك يهوى مديح النبى 
يسكر على رقه و صجاتـه
وسبحته الملفوفه على صدره 
تحكى بالواحده ،
سيرته وآهاته 
جاى من أخر حتة ف توبك 
ببابور جازه . .
وعيشه و قريشه 
وسكره و شايه . . 
وملايته و عياله
يفرش ، يمدد ولا يتودد 
لا يخاف عفريت و لا مارد 
خارج من داره
وبايع نفسه و شارد 
يقولوا مخاوى 
ينده وبحس عالى . . و قاوى 
بدران . . عـواض . . يا قـناوى
ما بيعرفش معنى الأه
ويقولك . . زاير بيت الله
حاسس أنه أكبر واعرض م الأرض 
مايهمه ينام بالطول او بالعرض
لابيهمه سقعه و لا جوع 
ولا بصه عين تانيه وتالت
كفاياه و عياله طبق النابت