عندى سؤال .. متزعليش
أنا جوه منك أبقى أيه ؟؟؟
أنا عمر عشتى سنين طوال تستنى فيه ؟
ولا مجرد حلم وردى بتفرحى لما تشوفيه
و أما النهار يطلع .. يدوب
و تعيشى نفس اللى تعيشيه ؟؟
ولا يدوب .. أنسان حنون .. مليان جنون
من برد قسوة وحدتك تتدارى فيه ؟؟؟
نفسى حقيقى أفهمك
و أعرف انا جواكى ايه
أصلك ساعات .. بتقربى حد التماس
و بحس أنى فى دنيتك .. دنيا .. و ناس
و بدون سبب .. بالقاكى فجأه بتهربى
و فى عز أوقات العطش .. تتسرسبى
و يدور سؤال
أزاى فى لحظة أوحشك ؟
و فى لحظة تانية كأنى طيف ؟؟
و أزاى فى ليلى بتشرقى ؟
و زهورنا تطرح فى الخريف ؟؟
أنا مش ضعيف
ولا ضل شجرة فى وقت صيف
ولا ممكن أقبل أبقى طيف
ما تستغربيش
الزهرة لازم تتروى علشان تعيش
و الطير عشان يعلا لابد يكونله ريش
و أنا صباره تستحمل عطشها سنين
و طير هايم بأحلامه مع العاشقين
لكن لازم نكون واضحين
أنا جواكى أطلع مين؟؟
حبييب .. ولا
صــديق .. ولا
ما بين الاتنين
سؤالى بسيط لكن لازم
يكون له جواب
أخاف نصحى و نلقانا
برغم الحلم جوانا
بقينا اغراب
( هشام الحبشى )